- - - - - - - - -
بورصة الدواجن اليوم الثلاثاء 23 مايو 2017
النوع السعر
سعر الابيض 30
سعر الساسو 31
الكتكوت الأبيض(أهالي) 3.75 - 8
الكتكوت الساسو 1.75 - 3
اضغط هنا لمعرفة سعر الكتكوت الأبيض(شركات) لبورصة الدواجن يوم الثلاثاء 23 مايو 2017
اضغط هنا لمعرفة أسعار بيض الدواجن يوم الثلاثاء 23 مايو 2017


أخبار الموقع

الأدوية البيطرية المستخدمة في علاج الدواجن


هنتكلم في الموضوع ده  باذن الله عن مجموعة الأدوية المختلفة التي تستخدم في مجال الدواجن وعلاج الطيور الاخري ومن هذه الادوية المضادات الحيوية والأدوية الطاردة للديدان والمركبات الدوائية المستخدمة في علاج الكوكسيديا وبعض مبيدات الطفيليات الخارجية .

بس هنبدأ الأول في التعرف علي المضادات الحيوية وطريقة عملها في محاربة الميكروبات داخل جسم الطائر والجرعات المستخدمة في عملية العلاج , لازم الأول قبل مانبدأ نذكركم بشوية حاجات وهي ان استخدام المضادات الحيوية له اهمية كبيرة في القضاء علي الميكروبات المسببة للأمراض  ولكن يجب عدم الافراط في استخدامها لان معظم الادوية بيكون لها اثار جانبية وكمان لازم نتبع توصيات الشركة المنتجة وكما يوصي الطبيب البيطري لان استخدام جرعات صغيرة او بطريقة غلط  بيخلي البكتيريا تكتسب مناعة ضد الدوا ده فتيجي تعالج بيه بعد كدة ميديش نتيجة وديه مشكلة كبيرة جدا بتسبب فظايع وخساير كبيرة في بورصة الدواجن نتيجة لعدم الوعي في استخدام الدواء زي مثلا في ناس بتحضن في اول الدورة بعد استقبال الكتاكيت بأدوية شديدة جدا زي مثلا التيلوزين وتيجي بعد كده تستخدمه اما تظهر مشاكل تنفسية متلاقيش نتيجة عشان كده يجب التدرج في استخدام المضادات الحيوية علي حسب عمر الكتاكيت وحسب الحالة المرضية وياريت منسمعش كلام اي حد ولازم ناخد طريقة العلاج من طبيب بيطري.

كمان في عملية العلاج لازم اراعي ان كل عدد ليه ظروفه يعني اللي مربي الف فرخة غير اللي مربي خمسين فرخة غير اللي عامل عنبر فيه الاف من الدواجن وده بيحدده الدكتور البيطري , كمان لازم نخلي بالنا اما نيجي نستخدم كذا مضاد حيوي مع بعض لان بعض الادوية بتلغي عمل الدوا الأخر فميبقاش ليه لازمة كأنك محطتش حاجة في المية وبعض الادوية مع بعض بتسبب سمية وموت للطائر وبعض الادوية  بتلغي تأثير بعضها وبعض الادوية اما نستخدمها مع بعض بتديني تأثير أقوي من استخدام كل واحد لوحده يعني بيقوا بعض والحاجات دي طبعا هيقولك عليها الطبيب البيطري وهيعرفك ازاي تستخدم الدوا صح عشان سلامة الفراخ وسلامة جيبك من الفلوس عشان متقعدش تصرف فلوس في الهوا وكمان هيقولك ان كان الدوا ده بيتحط في مياه الشرب ولا بيتخلط مع العلف ولا بتحقنه سواء كان في العضل او تحت الرقبة او هترشه في العنبر وهتعرف تحط المية اللي فيها الدوا كام ساعة قدام الطيور لان بعض كل دوا ليه مدة تأثير وبعد كدة بيفقد تأثيره في المياه وكلنا عارفين ان الاصابات في الدواجن بتبقي مختلطة (mixed) يعني ممكن يبقي عندك مشكلة في الجهاز الهضمي ومشكلة اخري في الكلي او الجهاز التنفسي فلازم ننظم عملية اعطاء الدوا للطيور .




معلش طولنا عليكو شوية في المقدمة بس لانها حاجات مهمة جدا عشان يبقي عندنا وعي في التربية وننهض بصناعة الدواجن في ظل الظروف الصعبة اللي بنمر بيها .العلماء قسموا المضادت الحيوية علي اساس عدة اعتبارات أولا علي حسب طريقة عملها في القضاء علي البكتيريا الأولي مضادات حيوية بتأثر علي بروتين الخلية  البكتيرية زي : مجموعة التتراسيكلين , الأمينوجليكوسيد , ماكروليد , كلندامايسين , كلورامفينيكول .

والثانية مضادات حيوية بتأثر علي الحمض النووي للبكتيريا زي :مجموعة  الفلوروكينولون , اللينكومايسين , ريفامبين والثالثة مضادات حيوية بتأثر علي الجدار الخلوي للبكتيريا زي : مجموعة البنسيللينات , فانكومايسين , نوفوبيوسين , سيفالوسبورين .(عشان كدة مينفعش استخدم واحد من دول في علاج المايكوبلازما لان البكتيريا دي ملهاش جدار خلوي فالمضاد الحيوي ده مش هيشتغل عليها ) والرابعة مضادات حيوية بتشتغل علي الغشاء الخلوي للخلية البكتيرية زي : امفوتريسين ب , بوليمكسين b,e (الكولستين) والخامسة مضادات حيوية  بتأثر علي عمليات الأيض للبكتيريا زي : مركبات السلفا وهنتكلم عنها بالتفصيل في مضادات الكوكسيديا .

ثانيا حسب المجال بتاعها فهناك مضادات حيوية واسعة المجال بتشتغل علي البكتيريا السالبة والموجبة لصبغة الجرام زي (التتراسيكلين , والبنسيللينات , انروفلوكساسين) و مضادات حيوية ضيقة المجال وهي نوعين النوع الاول بيشتغل علي البكتيريا سالبة الجرام بس زي( الكولستين , ستربتومايسين) والنوع الثاني بيشتغل علي البكتيريا موجبة الجرام بس زي( باستراسين).

ثالثا حسب تأثيرها علي البكتيريا  مضادات حيوية موقفة لنمو البكتيريا مثل : تتراسيكلين , ماكروليد , نوفوبيسين , ومضادات حيوية قاتلة للبكتيريا مثل : ستربتومايسين , البنسيللين , السيفالوسبورين زي سيفوتاكس, كولستين و نطلع من النقطة دي انه لازم نحدد نوع المضاد الحيوي اللي هنستخدمه في العلاج حسب مناعة الطيور فلو الطيور مناعتها كويسة والحالة المرضية مش شديدة ممكن استخدم المضادات الحيوية الموقفة للنمو , ولكن لو مناعة الطيور ضايعة لازم استخدم مضاد حيوي قاتل للبكتيريا لان الفرخة مفيهاش مناعة انها تساعد الدوا علي البكتيريا فبديها حاجة من الأخر عشان تموت البكتيريا وبعدين ادي رافع مناعة للدواجن .

رابعا حسب درجة امتصاصها (عند استخدامها في مياه الشرب) وقسموها الي مضادات حيوية لاتمتص من المعدة فمش هتوصل للدم ومش هتروح لبقية الجسم فهتفضل في معدة الطائر وهتشتغل بس علي البكتيريا المعوية فقط مثل ستربتومايسين , نيومايسين , كولستين , جينتامايسين  و مضادات حيوية أخري متوسطة الامتصاص من المعدة بتشتغل علي العدوي المعوية والجهازية ولكن بطيئة زي اوكسي تتراسيكلين , امبيسللين , سلفاكينوكزالين , اريثرومايسين ومضادات حيوية اخري عالية الامتصاص من المعدة فبتوصل لبقية الجسم وبتعالج العدوي الجهازية زي المشاكل التنفسية والكلوية وغيرها ومن امثلة هذه الأدوية  الأموكسيسيللين , انروفلوكساسين ,الدانوفلوكساسين , سلفاديازين  وان شاء الله هنبدأ في الموضوع القادم نتكلم عن كل مضاد حيوي يستخدم في الدواجن والجرعات المستخدمة.






ليست هناك تعليقات

يشرفنا مشاركة تعليقك علي الموضوع